कहाँबाट सुरु हुन्छ मातृभूमि ?

-मिखाइल मातुसोभ्सकी 

कहाँबाट सुरु हुन्छ मातृभूमि ?

हुन्छ कि बर्णमालाको चित्रबाट

या असल र विश्वासिला

चोकका पुराना मित्रबाट ?

कि सुरु हुन्छ मातृभूमि

आमाले गाएको गानबाट

या जस्तै कठीनाइमा पनि

नझुक्ने स्वाभिमानबाट ?   

सुरु हुन्छ कि मातृभूमि 

चौतारीको दौंतरी भेटबाट ?

या हुन्छ बतासमा झुल्दै हुर्कने

ती बर-पीपलको बोटबाट ? 

कि सुरु हुन्छ मातृभूमि

मैनाको वासन्ती स्वरबाट

या सुदूरसम्म तन्किएको

गाऊँको बाटो र घरबाट ? 

कहाँबाट सुरु हुन्छ मातृभूमि ?

हुन्छ कि क्षितिजको ज्योतिबाट

या हुन्छ कन्तुरमा भेटिएको

बुवाको सिपाही टोपीबाट ?

कि सुरु हुन्छ मातृभूमि

छुकछुक रेलको धुनबाट 

या पहिलो बाचा मायाको

साँचेको तिम्रो मनबाट ?!

साँच्चै, कहाँबाट सुरु हुन्छ मातृभूमि ?

(सन् १९६८ मा प्रकाशित रुसी कविताको भावानुवाद: जुगल भूर्तेल)

(नेपाल साप्ताहिक, २९ चैत्र २०७१)